Aktualitet dhe Lajme

OKB: Shkatërrimi i Gazës nga Izraeli duke synuar “zonën neutrale” është një krim lufte

Share

Shefi i OKB-së për të drejtat e njeriut tha sot se shkatërrimi i ndërtesave nga ushtria izraelite në zonën kufitare me Izraelin në Gaza, me qëllim krijimin e një ” zone neutrale”, përbën një “krim lufte”.

“Fatkeqësitë që synojnë krijimin e një “zone neutrale” për arsye sigurie nuk plotësojnë kriteret e ligjit ndërkombëtar humanitar,” tha Volker Turk në një deklaratë për shtyp.

“Unë insistoj tek autoritetet izraelite për faktin se neni 53 i Konventës së Katërt të Gjenevës ndalon shkatërrimin e pronave që u përkasin individëve privatë, përveç nëse një shkatërrim i tillë është bërë absolutisht i nevojshëm për operacione ushtarake,” vuri në dukje ai.

“Shkatërrimi masiv i ndërtesave, i pajustifikuar me urdhër ushtarak dhe i kryer në mënyrë arbitrare përbën një krim lufte”, nënvizoi Komisioneri i Lartë i Kombeve të Bashkuara për të Drejtat e Njeriut.

Komisioneri i Lartë i OKB-së për të Drejtat e Njeriut tha gjithashtu se që nga tetori, agjencitë e tij kanë regjistruar “shkatërrim dhe prishje të gjerë të infrastrukturës civile nga ushtria izraelite”.

Bëhet fjalë kryesisht për “ndërtesa banimi dhe universitete në zona ku luftimet nuk janë zhvilluar ose nuk po zhvillohen më”.

Një shkatërrim i tillë është parë javët e fundit në Beit Hanoun dhe në qytetin e Gazës në veri të enklavës palestineze të rrethuar, si dhe në kampin Nuseirat dhe Khan Younis në jug.

“Izraeli nuk ka dhënë arsye bindëse për të justifikuar këtë shkatërrim masiv të infrastrukturës civile,” theksoi Turk.
Këto shkatërrime duket se “kanë qëllim ose efekt për ta bërë të pamundur kthimin e civilëve në këto zona”.

“I kujtoj autoriteteve se zhvendosja me forcë e civilëve mund të përbëjë krim lufte”, nënvizoi ai./albeu.com




Huazuar nga Albeu.com

Një kafe nga ju!

Back to top button