Tokio po përballet me një periudhë të pazakontë reshjesh, me shi që ka rënë për 34 ditë radhazi, duke shënuar një rekord për historinë e vëzhgimeve meteorologjike në kryeqytetin japonez.
Mungesa e ditëve me diell dhe lagështia e lartë kanë nisur të shkaktojnë pasoja në bujqësi. Mediat japoneze raportojnë probleme me rritjen e perimeve, ndërsa reshjet e vazhdueshme kanë ndikuar edhe në rendimentin e të korrave.
Situata ka shtuar shqetësimet për fermerët, të cilët po përballen me toka të tejngopura me ujë dhe kushte jo të favorshme për zhvillimin normal të kulturave bujqësore.
Sipas parashikimeve, reshjet mund të fillojnë të ndërpriten në fillim të muajit tetor, duke i dhënë fund një prej periudhave më të gjata me shi të regjistruara në Tokio.
Ndërkohë, në zonat ku toka është mbushur me ujë, autoritetet kanë paralajmëruar banorët për rrezikun e rrëshqitjeve të dheut. Shirat e zgjatur mund të dobësojnë terrenin dhe të rrisin rrezikun e incidenteve, veçanërisht në zonat kodrinore dhe me pjerrësi.
