Çifti shqiptar kapet duke trafikuar mbi 17 kg kokainë, sekuestrohen edhe armë! Zbulohet baza sekrete, droga fshihej në…

Një çift shqiptar është kapur teksa po trafikonte një sasi të konsiderueshme me mbi 17 kg kokainë të pastër me vlerë mbi 2 mln euro në treg.

Ndalimi erdhi pas një operacioni në shkallë të gjerë kundër grupeve kriminale në rajonin e Puljas. Policia e Barit njoftoi se bashkë me Prokurorinë nisën më 1 tetor pranë Leçes aksionin që çoi gjithashtu edhe në sekuestrimin e armëve dhe pajisjeve të paketimit të drogës.

Të arrestuarit janë një shtetas shqiptar 40-vjeçar dhe një grua 52-vjeçare, të dy banues në Altamura.

Hetimi filloi falë vëzhgimit dhe ndjekjes së kujdesshme nga hetuesit e Skuadrës së Leçes. Oficerët identifikuan një automjet të dyshimtë, që besohet se ishte i përfshirë në transportimin e drogës së destinuar për tregun vendas.

Automjeti u ndalua përgjatë autostradës SS 613, pranë Leçes , ku u krye një kontroll i plotë.

Gjatë inspektimit, oficerët zbuluan se makina ishte modifikuar me funde të dyfishta të prodhuara në mënyrë artizanale, me hapje mekanike, të fshehura nën sediljet e përparme.

Hetimi u shtri më pas në një shtëpi dhe garazh në Altamura, ku banojnë të arrestuarit. Oficerët gjetën aty një sasi të madhe narkotikësh dhe mjete të shumta të përdorura për paketimin e tyre.

Gjatë kontrolleve, u sekuestruan në total mbi 17 kilogramë e 400 gramë kokainë, të ndarë në blloqe dhe qese të paketuara me vakum. Përveç drogës, forcat e rendit gjetën një pistoletë gjysmëautomatike të kalibrit 9×19, të kompletuar me karikatorë dhe municione.

U sekuestruan një presë metalike, një makinë paketimi me vakum dhe materiale të shumta paketimi, të gjitha mjete tipike që përdoren për paketimin e drogës për trafikim.

Nëse shitej me doza në treg, droga gjeneronte mbi 2 mln euro fitime. Dy të arrestuarit, një burrë 40-vjeçar shqiptar i njohur tashmë për forcat e rendit dhe një grua 52-vjeçare, u dërguan në mjediset përkatëse të burgjeve.