Ministrat, stafi i tyre ministror dhe zyrtarët e lartë qeveritarë tani do t’i nënshtrohen testeve të drogës në Francë.
Mediat franceze raportuan se kryeministri Sebastien LeCornu lëshoi një qarkore duke u urdhëruar ministrave të organizojnë “teste surprizë dhe të detyrueshme të drogës, në formën e testeve të pështymës”.
Përveç anëtarëve të kabinetit, masa ka të bëjë me komisionerët, sekretarët dhe përfaqësuesit e administratave shtetërore, ambasadorët, konsujt e përgjithshëm, prefektët, drejtorët e shërbimeve aktive të policisë që punojnë në administratën qendrore dhe rektorët e akademive.
Anëtarët e qeverisë janë përgjegjës për hartimin e “listës së kategorive të punës që mund t’i nënshtrohen kontrolleve të rregullta” dhe duhet t’i paraqesin një plan veprimi kreut të qeverisë “para 26 qershorit”, ndërsa më pas do të paraqesin një raport mujor mbi zbatimin e tij, specifikon qarkorja.
“Përdorimi i drogës nga zyrtarët shtetërorë, përfshirë përdorimin e rastit në një mjedis privat, përbën, përtej rrezikut për veten e tyre dhe ndikimit në shërbim, një dobësi personale që mund të shfrytëzohet nga grupet e presionit, rrjetet kriminale ose taktikat e ndërhyrjes”, shpjegon Kryeministri francez në këtë dokument.
Shteti nuk mund të ndjekë një politikë kundër trafikimit të drogës dhe pasojave të tij në shoqëri pa imponuar standarde të rrepta mbi veten”, thekson gjithashtu një njoftim për shtyp përkatës, duke specifikuar se zyra e Kryeministrit tashmë i ka përmbushur këto kërkesa.
Qarkorja e Kryeministrit më në fund thotë se nëse një test droge rezulton pozitiv, ministrat do të jenë në gjendje të vlerësojnë pasojat, “duke përfshirë masat disiplinore”, dhe t’i referojnë përdoruesit “në qendrat e trajtimit”.
Gjithashtu sqaron se këto kontrolle “shoqërohen me garanci të qarta: e drejta për një mendim të dytë, mbrojtja e të dhënave personale dhe konsultimi paraprak me përfaqësuesit e stafit”.
starnews.al
