Italia paraqiti në mbledhjen urgjente të ministrave të Brendshëm të Bashkimit Evropian një propozim për krijimin e qendrave të financuara nga BE-ja në vende të treta, përfshirë Shqipërinë, ku do të përpunoheshin kërkesat për azil dhe do të organizoheshin kthimet e migrantëve që nuk kanë të drejtë të qëndrojnë në territorin e Unionit.
Ministri italian i Brendshëm, Matteo Piantedosi, theksoi se Bashkimi Evropian duhet të veprojë në mënyrë të bashkuar për të parandaluar migracionin e parregullt që në vendet e origjinës dhe për të forcuar mekanizmat e kthimit. Në të njëjtën linjë, Greqia propozoi pezullimin e përkohshëm të shqyrtimit të kërkesave për azil në situata të migrimit masiv të përdorur si mjet presioni politik, si edhe rritjen e rolit të Frontex dhe bashkëpunimit me vendet e treta.
Nga ana tjetër, Mali i Zi deklaroi se nuk ka zhvilluar negociata për ngritjen e qendrave të tilla në territorin e tij dhe se do ta refuzonte një propozim zyrtar. Ndërkohë, ministrat e BE-së ranë dakord të përqendrohen në forcimin e kontrollit të migracionit, ndërsa diskutimet për këto masa do të vazhdojnë në takimet e planifikuara gjatë muajit tetor.
starnews.al