Informaliteti i pagave, 51 % e të moshuarve marrin pension të pjesshëm

Informaliteti i lartë ndër vite po reflekton pasojat edhe në skemën e pensioneve në Shqipëri. Të dhënat zyrtare nga Instituti i Sigurimeve Shoqërore tregojnë se vitin e kaluar, 51% e pensionistëve përfituan pension të pjesshëm. Ekspertët thonë se efektet sapo kanë nisur të ndihen.

“Sapo ka filluar ndjesia e asaj se ç’do të thotë të kesh informalitet dhe një reformë e cila nuk është përmbushur në të gjitha masat e saj. Ajo që ndikon në gjithë këtë është ajo që u korr gjithë këto vite. Pra kemi një pjesë të punonjësve, të cilët nuk arrijnë dot të përmbushin vitet dhe natyrshëm u rezulton një nivel shumë i ulët pensioni. Nga ana tjetër, edhe pagat e ulëta ndikojnë në shumën e pensionit.”

“Çdo vit janë 2% më shumë pensionistë, të cilët nuk kanë plotësuar vitet e plota të punës për daljen në pension.”

Për këtë arsye, ekspertët rekomandojnë së pari luftën kundër informalitetit.

“Duhet të luftohet evazioni në sisitem që rrit numrin e kontributeve dhe nga tjetër të vihen në zbatim pensionet private që mund të krijojnë në të ardhmen një mundësi më shumë.”

Në vitin 2014, 28 për qind e pensionistëve merrnin pension të pjesshëm. Ekspertët thonë se mosplotësimi i kritereve për pension të plotë rrezikon të rrisë varfërinë në moshat e vjetra./a.m. (Tv Klan)