Një incident i papritur në palestër i ndryshoi jetën Tom Park-Paul, i cili në moshën 34-vjeçare u diagnostikua me një keqformim arteriovenoz (AVM) në tru, që kishte shkaktuar një hemorragji cerebrale. Historinë e tij ai e ka rrëfyer për The Guardian.
“Një të diel të majit 2017, isha në palestër kur dëgjova një ‘pop’. Nuk ndjeva dhimbje, por mbeta i shtangur. Mendova se kisha pësuar goditje në tru”, tregon Park-Paul, i cili kishte humbur ndjesinë në këmbën e majtë.
Ai u dërgua në urgjencën e spitalit St Thomas’ në Londër, por mjekët dyshuan për një dëmtim të shtyllës kurrizore dhe e lanë të largohej. Ndërkohë, imazhet e rezonancës magnetike të trurit nuk u identifikuan në kohë.
Disa ditë më vonë, një mik i tij, atëherë infermier në terapi intensive, këmbënguli që të kryhej një skaner CT. Ekzaminimi zbuloi një hemorragji masive në tru dhe Park-Paul u dërgua te specialistët e King’s College Hospital. “Ma shpëtoi jetën. Antikoagulantët mund të më kishin vrarë”, rrëfen ai.
Reklamë
Mjekët zbuluan se ai kishte një keqformim arteriovenoz, një grumbull enësh gjaku të ndërthurura në mënyrë jonormale, i cili ishte çarë pranë zonës së trurit që kontrollon lëvizjen e gjymtyrëve. AVM-ja u vlerësua me gradën 4 sipas sistemit Spetzler-Martin dhe ndërhyrja konsiderohej me rrezik të lartë.
Operacioni u krye disa javë më vonë dhe zgjati më shumë se 16 orë. Në fund të ndërhyrjes ndodhi edhe një incident i pazakontë: pjesa e kafkës që ishte hequr gjatë operacionit ra në dyshemenë e sallës. Mjekët e pastruan dhe pacientit iu dhanë antibiotikë shtesë.
“Edhe tani, më duket jashtëzakonisht qesharake që kafka ime përfundoi në dysheme. Më pëlqen të imagjinoj se e ngritën, e shkundën pluhurin dhe thanë: ‘Rregulli i pesë sekondave!’”, rrëfen ai me humor, ndërsa e përshkruan ndërhyrjen si një moment që i shpëtoi jetën.
/vizionplus.tv
Start News
