Vrasja e 22-vjeçares shqiptare/ Babai: E takuam në komisariat të dashurin e saj dhe më përqafoi! Ja si e kuptova se s’po përgjigjej ajo në mesazhe
Trupi i 22-vjeçares shqiptare, Ilaria Sula, studente në Itali, e cila ishte raportuar e zhdukur që nga 25 marsi është gjetur sot në një valixhe të hedhur në një luginë.
Autori i dyshuar kryesor i vrasjes është i dashuri i saj filipinez Mark Samson. Ky i fundit dyshohet se vrasjen e ka kryer në banesën e tij në sy të prindërve. Ndërkohë lidhur me ngjarjen e rëndë ka folur Flamur Sula, babai i të ndjerës.
Ai tregon se të shtunën kishin bërë denoncimin për zhdukjen e vajzës, ndërsa të dielën kishte takuar në komisariat të dashurin e saj. Sipas babait të viktimës ai duket ai i kishte thënë se i vinte dhe dukej i shqetësuar për zhdukjen e saj.
“Hera e fundit që kemi dëgjuar Ilarian ishte të martën dhe na tha se do të kthehej në shtëpi të shtunën”, tregon ai në një intervistë në programin “Chi l’ha Visto?” që do të transmetohet sonte në orën 21:20 në Rai Tre.
“Ajo jeton me shoqet në Romë, ku ndjek universitetin. Ajo ishte telefonata e fundit, pastaj kemi marrë mesazhe nga telefoni i saj. Ishte sikur të ishte vajza ime që shkruante: ‘Ciao, babi, mos u shqetëso. Jam mirë. Jam larguar me një djalë dhe një vajzë. Do të kthehem në Terni pas një muaji’”.
Më tej, Flamur Sula vazhdon: “Shkruante ‘mos u shqetëso, jam mirë’. Kjo gjë na ngriti dyshime. Nëse do të kishte qenë vërtet vajza ime, do të më kishte telefonuar. Të shtunën shkuam të bënim denoncimin për zhdukjen e saj. Më pas, të dielën, në komisariat takuam Mark Samsonin, të dashurin e vajzës sime. Nuk e dinim që ishin ndarë. Ai na tha se i vinte shumë keq, se ishte i shqetësuar për zhdukjen e saj. Duket i qetë, madje më përqafoi”.
