Aktualitet dhe Lajme

U tha se qëlluan drejt palestinezëve teksa prisnin ndihmat, reagon Izraeli

Share

Ushtria izraelite mohoi se ushtarët e saj qëndronin pas incidentit, duke thënë se palestinezë të armatosur kanë hapur zjarr ndërsa turma njerëzish po prisnin kamionët me ndihma në veri të Rripit të Gazës.

Sipas autoriteteve shëndetësore në Gazë, gjatë incidentit të së enjtes u vranë 21 persona.

Në fund të shkurtit, një incident i ngjashëm ndodhi kur dhjetëra palestinezë u vranë ndërsa prisnin për kamionët e mbushur me ushqime në pjesën veriore të Gazës, një zonë që vuante nga mungesa e madhe e ndihmave humanitare, teksa lufta mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – po vazhdon që nga 7 tetori.

Ministria e Shëndetësisë në Gazën e udhëhequr nga Hamasi fajësoi Izraelin për vdekjet në veri të Gazës të enjten. Më 15 mars, ushtria izraelite tha se ka kryer hetimet fillestare dhe ka ardhur në përfundim se trupat e saj nuk kanë shtënë drejt palestinezëve.

“Sipas rishikimit tonë, nuk ka pasur të shtëna drejt civilëve në Gazë apo ndaj autokolonës së ndihmës nga forcat tokësore, tanket apo zjarr nga sulmet ajrore”, tha ushtria izraelite, duke thënë se drejt civilëve kanë shtënë palestinezët e armatosur.

Luftimet në Gazë kanë detyruar banorët e Gazës të shpërngulen nga shtëpitë e tyre dhe sipas Kombeve të Bashkuara ata po përballen me uri.

Izraeli ka hedhur poshtë akuzat e bëra nga qeveritë e huaja dhe agjencitë e ndihmës se ka penguar furnizimet me ushqim dhe produkte të tjera për 2.3 milionë banorët në Rripin e Gazës.

Lufta në Gazë nisi pasi Hamasi kreu sulme në jug të Izraelit duke vrarë afër 1.200 persona dhe duke rrëmbyer afër 250 të tjerë. Izraeli u kundërpërgjigj me ofensivë tokësore dhe ajrore në Rripin e Gazës që deri më tani ka lënë të vdekur mbi 31.000 persona në Gazë, shumica gra dhe fëmijë, sipas Ministrisë së Shëndetësisë në enklavën palestineze./REL




Huazuar nga Albeu.com

Një kafe nga ju!

Back to top button