Situata alarmante në Dibër: Fshatrat dhe rrugët kryesore të bllokuara nga dëbora
Një ndër qarqet më të dëmtuara dhe bllokuara nga reshjet e dëborëqs dhe ngricat është qarku i Dibrës i cili raportohet që është i bllokuar totalisht.
Reshjet e dëborës kanë vazhduar në mënyrë intensive edhe gjatë natës duke bllokuar pjesën më të madhe të rrugëve të Dibrës.
Trashësia e borës në qytet shkon mbi 40 cm ndërsa në zona të thella kalon mbi 60-70 cm.
Gjendja në akse:
Akset rrugore Peshkopi – Tiranë është i kalueshëm me vështirësi me zinxhirë, pjesa më e vështirë që bllokohet herë pas here nga Pishat e Bulqizës deri në Qafën e Buallit pasi fryn erë e fortë dhe mbush me borë trupin e rrugës.
Aksi Peshkopi – Qafë Draj – Kukës është i bllokuar.
Aksi Peshkopi – Kukës kalohet me vështirësi me zinxhirë deri në Kalanë e Dodës, ndërsa nga Kalaja e Dodës më tej e bllokuar për shkak të erës së fortë.
Të gjitha fshatrat dhe njësitë administrative të Dibrës dhe Bulqizës janë të bllokuara, rrugët janë të pa kalueshme.
Në njësitë administrative Lurë, Kala e Dodës , Sllovë, Selishtë , Ostren, Martanesh mungon energjia elektrike. Deri tani nuk raportohen emergjenca shëndetësore nga zonat e thella.
