Drejtësia kineze ka dënuar me burgim të përjetshëm Xu Jiayin, themeluesin e gjigantit të pasurive të paluajtshme China Evergrande Group, ndërsa kompanisë dhe degës së saj të pasurive të paluajtshme u janë vendosur gjoba që arrijnë në rreth 2 miliardë euro.
Vendimi është dhënë nga një gjykatë në Shenzhen, ndërsa Xu Jiayin, i njohur edhe si Hui Ka Yan, është shpallur fajtor për disa vepra penale, përfshirë keqpërdorimin e fondeve, mashtrimin në mbledhjen e kapitalit dhe keqpërdorimin e depozitave publike.
Sipas gjykatës, përveç burgimit të përjetshëm, Xu është dënuar me gjobë, i janë hequr përgjithmonë të drejtat civile dhe është urdhëruar konfiskimi i të gjithë pasurisë së tij personale.
Gjoba prej rreth 2 miliardë eurosh
China Evergrande Group është dënuar me një gjobë prej 8.82 miliardë juanësh, rreth 1.12 miliardë euro, ndërsa Evergrande Real Estate është gjobitur me 7 miliardë juanë, rreth 890 milionë euro.
Në total, gjobat ndaj kompanive arrijnë në rreth 2 miliardë euro.
Pesë drejtues të tjerë të lartë të grupit janë dënuar gjithashtu me gjoba dhe dënime me burgim nga gjashtë deri në 18 vjet.
Nga miliarder në burgim të përjetshëm
Xu Jiayin ishte dikur një prej biznesmenëve më të fuqishëm të Kinës dhe themeluesi i kompanisë që u shndërrua në një prej gjigantëve më të mëdhenj të sektorit të pasurive të paluajtshme.
Evergrande, dikur kompania më e madhe e ndërtimit në Kinë, u përball me një krizë të rëndë financiare dhe deklaroi falimentimin në vitin 2021.
Në atë kohë, grupi kishte borxhe prej rreth 300 miliardë dollarësh, duke u bërë një prej simboleve kryesore të krizës së sektorit kinez të pasurive të paluajtshme.
Xu u deklarua fajtor në prill për tetë akuza penale. Vendimi i fundit i gjykatës shënon një nga kapitujt më të rëndësishëm në rënien e një prej biznesmenëve që dikur simbolizonte suksesin dhe pasurinë në Kinë.
Megjithatë, sipas analizave të raportuara nga Reuters, dënimi i Xu Jiayin ka pak gjasa të sjellë lehtësim për kreditorët vendas dhe të huaj të Evergrande, të cilët kanë pësuar humbje të mëdha nga kolapsi i kompanisë.
Rënia e Evergrande mbetet një prej episodeve më të mëdha të krizës së pasurive të paluajtshme në Kinë, një sektor që vazhdon të rëndojë mbi ekonominë e dytë më të madhe në botë.
starnews.al
