Vetëm brenda pak muajsh, ai bleu 85 apartamente luksoze përgjatë lumit Tamiz në Londër, përfshirë 7 brenda një dite të vetme, për një vlerë totale prej 108 milionë paundësh, afërsisht 120 milionë euro.
Shtypi britanik e përshkroi atë si një “investitor misterioz kinez të pasurive të paluajtshme”, ndërsa disa e kishin quajtur “Z. X”.
Tani, autoritetet britanike e kanë identifikuar atë dhe i kanë ngrirë përkohësisht të gjitha pasuritë. Personi misterioz quhet Xu Jiangbo dhe kërkohet në Kinë së bashku me bashkëpunëtorët e tij për lojëra të fatit të paligjshme, mashtrim dhe krim kibernetik.
Aktivitetet e tij përfshijnë drejtimin e një kazinoje të paligjshme në provincën juglindore të Fujian.
Sipas mediave ndërkombëtare, blerjet e tij në Londër duket se po ndjekin një strategji të provuar dhe të testuar për pastrim parash.
Ai shënjestroi rrokaqiejt dhe ndërtesat e reja, duke blerë apartamente në masë: gjysmë duzine në një ndërtesë, dhjetë në një tjetër e kështu me radhë.
Të dhënat e kompanive në Mbretërinë e Bashkuar, Hong Kong dhe Singapor tregojnë se Xu Jiangbo mban një pasaportë nga Saint Kitts dhe Nevis, një komb i vogël i Karaibeve që shet shtetësi për rreth 270,000 dollarë, duke ofruar qasje pa viza në më shumë se 150 vende. Ai është gjithashtu shtetas i Kamboxhias.
Të ashtuquajturat “pasaporta të arta”, të fituara përmes programeve të shtetësisë me anë të investimit, duhet të shkaktojnë “kontrolle të përforcuara të kujdesit të duhur”, sipas legjislacionit të Mbretërisë së Bashkuar për pastrimin e parave dhe financimin e terrorizmit.
starnews.al
