Sekretari amerikan i Shtetit, Marco Rubio, hapi ditën e dytë të Munich Security Conference, duke deklaruar nga foltorja se Shtetet e Bashkuara dëshirojnë të bashkëpunojnë me Europën për riformësimin e rendit global. Ai përdori një ton dukshëm të ndryshëm nga ai i JD Vance një vit më parë
Në atë kohë, zëvendëspresidenti amerikan kishte kritikuar ashpër Europën për varësinë e tepruar nga SHBA-ja dhe kishte ngritur akuza për një sërë çështjesh, përfshirë menaxhimin e migracionit.
“Nën presidentin Trump, SHBA-ja ka marrë përsipër detyrën e ndërtimit të një bote të re. Shtetet e Bashkuara të Amerikës do të rifillojnë procesin e rinovimit dhe restaurimit, të udhëhequra nga vizioni për një të ardhme po aq krenare, sovrane dhe jetike sa kanë qenë qytetërimet tona në të kaluarën.
Dhe ndërsa jemi të përgatitur, nëse është e nevojshme, ta bëjmë këtë edhe vetëm, ne preferojmë dhe shpresojmë ta bëjmë së bashku me ju, miqtë tanë këtu në Europë”, tha Rubio.
Kryediplomati amerikan theksoi se SHBA-ja dëshiron të shohë një Europë të fortë. “Fati ynë është dhe do të jetë gjithmonë i ndërthurur me tuajin, sepse e dimë se fati i Europës nuk do të jetë kurrë i parëndësishëm për sigurinë tonë kombëtare. Pyetja është se çfarë po mbrojmë, sepse forcat ushtarake nuk mbrojnë diçka abstrakte”.
Rubio pranoi se SHBA-ja mund të jetë herë pas here “e drejtpërdrejtë dhe këmbëngulëse në këshillat që jep”, por u përpoq të sigurojë liderët europianë se administrata Trump mbetet e përkushtuar ndaj Aleancës. “Ne duam aleatë që mund të mbrojnë veten e tyre, në mënyrë që asnjë kundërshtar të mos ndiejë tundimin të sfidojë forcën tonë kolektive”, shtoi ai.
Ai iu referua gjithashtu shqetësimeve afatgjata të administratës Trump mbi pasojat e globalizimit.
Duke theksuar se migracioni masiv nuk është “një çështje periferike pa rëndësi të veçantë”, Rubio deklaroi se ai “vazhdon të jetë një krizë që transformon dhe destabilizon shoqëritë në të gjithë Perëndimin”.
“Së bashku, mund të riindustrializojmë ekonomitë tona dhe të rindërtojmë kapacitetin për të mbrojtur popujt tanë. Megjithatë, puna e kësaj aleance të re nuk duhet të përqendrohet vetëm në bashkëpunimin ushtarak dhe rikthimin e industrive të së kaluarës. Ajo duhet të përqendrohet gjithashtu në avancimin e interesave tona të përbashkëta për të ndërtuar një shekull të ri perëndimor”, u shpreh ai.
Ministri amerikan e përmbylli fjalimin me referenca të reja për bashkëpunimin dhe ringjalljen e miqësisë së vendit të tij me Europën. “Nuk synojmë të ndahemi, por të rigjallërojmë një miqësi të vjetër dhe të rinovojmë qytetërimin më të madh në historinë e njerëzimit”, tha ai para të pranishmëve.
Pasi përshkroi vizionin e Uashingtonit për drejtimin që duhet të marrë Perëndimi, Rubio e përmblodhi qasjen me këto fjalë: “Duam ta bëjmë këtë së bashku me ju, me një Europë krenare për trashëgiminë dhe historinë e saj… me një Europë që ka mjetet për të mbrojtur veten dhe vullnetin për të mbijetuar”, tha ai.
“Ne duam aleatë që janë krenarë për qytetërimin dhe trashëgiminë e tyre dhe që, së bashku me ne, janë të gatshëm dhe të aftë ta mbrojnë atë. Sepse ne në Amerikë nuk kemi asnjë interes të jemi kujdestarë të sjellshëm dhe të rregullt të një rënieje të kontrolluar të Perëndimit. Nuk kërkojmë ndarje, por ringjalljen e një miqësie të vjetër”, shtoi diplomati amerikan. “Fati ynë është i përbashkët dhe na pret”, përfundoi ai.
starnews.al