Presidenti turk, Rexhep Tajip Erdogan, deklaroi se pavarësisht vështirësive dhe pengesave që vazhdojnë në negociatat me Brukselin, anëtarësimi i plotë në Bashkimin Evropian mbetet objektiv strategjik i Turqisë.
“Diskutuam çështjet aktuale të politikës së jashtme, përfshirë zhvillimet e fundit në marrëdhëniet me Bashkimin Evropian. Anëtarësimi i plotë në BE është ende prioritet strategjik për ne, pavarësisht pengesave që dalin përpara,” tha Erdogan pas mbledhjes së kabinetit në Ankara.
Kërcënimet në Detin e Zi
Erdogan shprehu shqetësim për përshkallëzimin e vazhdueshëm të situatës së sigurisë në Detin e Zi si pasojë e luftës Rusi–Ukrainë, duke theksuar sulmin e fundit ndaj një anije–cisternë brenda zonës ekskluzive ekonomike të Turqisë.
Ai theksoi se Turqia do të vazhdojë të punojë për t’i dhënë fund luftimeve në Detin e Zi dhe për të forcuar stabilitetin rajonal.
“Sulmet ndaj anijeve tregtare në zonën tonë ekskluzive ekonomike përbëjnë një përshkallëzim shqetësues. Këto akte nuk mund të justifikohen në asnjë rrethanë, sepse rrezikojnë jetë njerëzish dhe mjedisin. Po bëjmë paralajmërimet e nevojshme për të gjitha palët,” deklaroi presidenti turk.
Mesazhe për çështjen kurde
Duke iu referuar procesit të brendshëm për zgjidhjen e çështjes kurde, Erdogan tha:
“Shpresoj dhe besoj se një Turqi pa terrorizëm dhe vëllazëria që synojmë të ndërtojmë në rajonin tonë do të çojë në shuarjen e të gjitha planeve të errëta dhe prishjen e lojërave të vjetra, duke hapur rrugën për një epokë të re.”
Ai shtoi se qeveria do të vazhdojë të punojë me qetësi dhe vendosmëri:
“Pa rënë pre e provokimeve dhe pa u dorëzuar ndaj gjuhës së zemërimit, do të veprojmë me sinqeritet. Askush nuk duhet të ketë dyshime: 86 milionë qytetarë do të bashkohen dhe, me vullnetin e Zotit, do ta shndërrojnë shekullin XXI në ‘Shekullin e Turqisë’,” përfundoi Erdogan.
starnews.al
