Programi ekonomik i PD, Berisha: 200 euro në muaj çdo shqiptari për të dalë nga mjerimi

Gjatë një takimi elektoral në një lagje të kryeqytetit, lideri i Partisë Demokratike, Sali Berisha, prezantoi një nga premtimet kryesore të programit të tij, duke thënë se do të vendoset një minimum jetik prej 200 euro në muaj për çdo shqiptar.

Sipas tij, kjo shumë përkthehet në rreth 6.3 euro në ditë, një nivel që sipas standardeve ndërkombëtare mjafton për të dalë nga mjerimi, edhe pse jo për të shmangur varfërinë.

Berisha theksoi se ky premtim është pjesë e një programi të hartuar me ndihmën e specialistëve vendas dhe të huaj, i cili synon të ndihmojë menjëherë shtresat më të prekura të shoqërisë. Ai u ndal veçanërisht te pensionistët, familjet që nuk arrijnë të ushqejnë fëmijët me tre vakte në ditë, dhe ata që nuk përballojnë dot blerjen e ilaçeve.

“Ky program do nisë me urgjencë për të ndihmuar ata që janë më në nevojë. Dhe ata që janë më në nevojë janë ata të cilët jetojnë në varfëri të skajshme. Ne kemi një ndërhyrje urgjente dhe kjo ndërhyrje urgjente është vendosja e minimumit jetik 200 euro. Çdo shqiptar do marrë 200 euro, çka do të thotë se ai do ketë 6.3 euro në ditë. Me 6.3 euro në ditë del nga mjerimi, prapë varfëri ka, por mjerim jo. Ky është standard ndërkombëtar, ky është standard real”, tha kreu i PD.

Në fjalimin e tij, Berisha akuzoi qeverinë aktuale për shpërfillje dhe përçmim ndaj qytetarëve, duke thënë se për 12 vite në pushtet, ajo nuk ka marrë masa të ndjeshme për të ndihmuar njerëzit në nevojë.

Ai kritikoi edhe propozimet e fundit të qeverisë, të cilat sipas tij janë kopje të shtrembëruara të programit të PD dhe premtime të kota për të ardhmen.