Vetëm një shtet i paguan gratë më shumë se burrat – Fast News Economy

Hendeku i pagave mes gjinive ka qenë një çështje e diskutuar dhe shqetësuese për një kohë të gjatë, dhe ende mbetet një temë e rëndësishëm si dhe problem në shumë vende të Europës. Megjithëse disa shtete kanë bërë përparime sa i përket uljes së këtij hendeku, gratë vazhdojnë të përballen me një pagë mesatare më të ulët se burrat, pavarësisht arsimimit më të lartë dhe angazhimit të tyre në punë.

Ky hendek nuk ka të bëjë vetëm me diferencën në pagat për punë të njëjtë, por gjithashtu lidhet me mundësitë e kufizuara për gratë në avancimin e karrierës, përfshirjen në pozita menaxhuese, dhe pjesëmarrjen e tyre në sektorët me paga më të larta.

Hendeku i pagave në shifra

Sipas studimeve, në Europë, gratë fitojnë mesatarisht 12.7% më pak se meshkujt për orë pune. Kjo do të thotë se për çdo 100 euro që fitojnë meshkujt, gratë fitojnë vetëm 87.3 euro.

Ky hendek pagash është shumë më i dukshëm në disa shtete të BE-së, si Estonia dhe Austria, ku diferenca është mbi 18%. Ndërsa Luksemburgu ka pasur një hendek të kundërt, duke paguar gratë më shumë se meshkujt, me 0.7% më shumë.

Pjesëmarrja e grave në punë dhe sektorin privat

Në sektorin privat, hendeku i pagës është më i lartë sesa në sektorin publik, ku paga shpesh përcaktohet nga kritere transparente, e cila siguron një shpërndarje të barabartë mes gjinive.

Shtetet si Çekia dhe Gjermania regjistrojnë hendekun më të madh në sektorin privat, ku gratë fitojnë për  80 euro për çdo 100 euro që fitojnë meshkujt.

Përparimet dhe sfidat

Ndërsa ka pasur disa përparime të vogla në uljen e hendekut të pagës, progresi ka qenë i ngadaltë.

Shtete si Spanja dhe Islandë kanë bërë përpjekje të mëdha për të mbyllur këtë hendek, me një rënie të dukshme të diferencës në pagë.

Faktorët që ndikojnë në hendekun e pagës

Ndarja sektoriale është një nga arsyet kryesore, pasi gratë janë më të përfaqësuara në sektorë me paga më të ulëta si kujdesi dhe arsimi.

Diskriminimi i pagës është një faktor tjetër i rëndësishëm, në shumë raste kur gratë paguhen më pak për punë të njëjtë.

Puna e papaguar dhe ndarja e padrejtë e barrës së kujdesit familjar ndikon gjithashtu në mundësinë e avancimit të grave në karrierë dhe pasurimin e tyre.

Gratë dhe arsimi

Ndërkohë që gratë janë më të arsimuara se meshkujt (37.1% e grave në BE kanë arsim të lartë krahasuar me 31.4% të meshkujve), ato vazhdojnë të përballen me pengesa më të mëdha për të gjetur punë të paguar mirë dhe për të mbajtur pozita të nivelit të lartë menaxhues.

Në vitin 2023, shkalla e punësimit për gratë ishte 64.9%, ndërsa për meshkujt ishte 74.7%, një diferencë që tregon se gratë janë më pak të përfshira në tregun e punës.

Ky hendek mes gjinive është më shumë se një çështje e drejtësisë sociale, ka një ndikim të drejtpërdrejtë në ekonominë dhe zhvillimin e shoqërive. Prandaj, është e nevojshme të që të vazhdojnë me masat për të mbyllur këtë hendek dhe për të siguruar mundësi të barabarta për të dyja gjinitë./ Euronews