Presidenti amerikan Donald Trump ka hedhur një tjetër ide për ndryshimin e emrit të një vendi, këtë herë duke synuar Nju Meksikon.
Trump publikoi në platformën Truth Social një hartë të shtetit jugperëndimor të SHBA-së, ku fjala “Meksikë” ishte fshirë dhe zëvendësuar me fjalën “Amerikë”, duke e shndërruar emrin “Nju Meksiko” në “Amerika e Re”.
Postimi ishte pjesë e një serie prej 34 publikimesh që Trump bëri në më pak se një orë të dielën, ku trajtoi tema të ndryshme, nga Irani dhe ekonomia, deri te zgjedhjet në Gjermani.
Në hartën e publikuar nga presidenti amerikan, fjala “Meksikë” ishte kryqëzuar me një “X” të madh të kuq, ndërsa poshtë saj ishte vendosur fjala “Amerikë”.
Imazhi u ripublikua më pas edhe nga llogaria zyrtare e Shtëpisë së Bardhë në X, por pa ndonjë shpjegim dhe pa u njoftuar ndonjë nismë zyrtare për ndryshimin e emrit të shtetit.
Megjithatë, ndryshe nga emrat e disa tipareve gjeografike që mund të ndryshohen për përdorim nga qeveria federale, presidenti amerikan nuk mund ta ndryshojë në mënyrë të njëanshme emrin e një shteti.
Pas “Gjirit të Amerikës” dhe “Liqenit Amerika”
Postimi i fundit i Trump vjen pas disa ndërhyrjeve të tij të mëparshme në emërtimet gjeografike.
Pas rikthimit në Shtëpinë e Bardhë në janar të vitit 2025, Trump nënshkroi një urdhër ekzekutiv për riemërtimin, për përdorim federal, të Gjirit të Meksikës si “Gjiri i Amerikës”.
Më 27 gusht 2026, ai nënshkroi një tjetër urdhër ekzekutiv për ta riemërtuar, për përdorim federal, Liqenin Ontario si “Liqeni Amerika”, në një kohë kur marrëdhëniet tregtare mes SHBA-së dhe Kanadasë mbeten të tensionuara.
34 postime në më pak se një orë
Harta e “Amerikës së Re” ishte vetëm një prej 34 postimeve të Trump në Truth Social brenda një kohe shumë të shkurtër.
Në një prej tyre, presidenti amerikan publikoi një imazh të manipuluar ku fytyra e tij ishte vendosur mbi trupin e mundësit të njohur Hulk Hogan, i cili mbante një shami me mbishkrimin “MAGA”.
Në një tjetër postim, kufijtë e Iranit ishin paraqitur në një formë që krijonte siluetën e fytyrës së Trump, ndërsa konflikti ushtarak me Teheranin vijon prej më shumë se gjashtë muajsh.
Trump publikoi gjithashtu disa grafikë që, sipas tij, paraqisnin arritjet ekonomike të administratës së tij.
Në një tjetër postim, ai ripublikoi një pamje ekrani që parashikonte rezultatin e zgjedhjeve të AfD-së në Saksoni-Anhalt, pa e shoqëruar me ndonjë koment.
starnews.al
