Shpërthen vullkani në Rusi pas tërmetit me magnitudë 8.8 ballë

Vullkani Klyuchevskoy në gadishullin e Kamçatkës në Rusi, ka nisur të shpërthejë pas tërmetit të fuqishëm me magnitudë 8.8 që goditi rajonin.

Sipas një njoftimi të publikuar në platformën Telegram nga Shërbimi Gjeofizik i Akademisë Ruse të Shkencave, ‘po vërehet rrjedhje e lavës së nxehtë në shpatin perëndimor, ndërsa mbi vullkan ka ndriçim të fortë dhe shpërthime të vazhdueshme’.

Vullkani Klyuchevskoy është një nga më të lartët në botë dhe ka shënuar disa shpërthime aktive gjatë viteve të fundit.

Kamçatka, ku ndodhet ky vullkan, ishte edhe epiqendra e tërmetit të regjistruar.