“Putin s’ka ndryshuar, është grabitqar”, Von der Leyen: Evropa ka një plan “mjaft të saktë” për të dërguar trupa në Ukrainë, SHBA na mbështet
Kryeqytetet evropiane po punojnë mbi “plane mjaft të sakta” për dërgimin e trupave ushtarake në Ukrainë, si pjesë e garancive të sigurisë pas përfundimit të luftës, tha presidentja e Komisionit Europian Ursula von der Leyen në një intervistë për Financial Times.
“Garancitë e sigurisë janë të një rëndësie të madhe dhe absolutisht thelbësore. Ne kemi një plan të qartë veprimi dhe kemi pasur një marrëveshje në Shtëpinë e Bardhë dhe kjo punë po ecën shumë mirë.”, shtoi ajo.
Von der Leyen foli gjatë një turneu në shtetet lindore të BE-së, gjatë të cilit ajo po përqendrohet në përpjekjet për të rritur shpenzimet kombëtare të mbrojtjes dhe për të forcuar gatishmërinë ushtarake të kontinentit.
Ajo tha se kryeqytetet po punonin mbi plane për “një vendosje trupash shumëkombëshe me mbështetjen e amerikanëve”.
“Presidenti Trump na siguroi se do të ketë një prani amerikane si pjesë e marrëveshjes. Kjo ishte shumë e qartë dhe u konfirmua në mënyrë të përsëritur.”, tha ajo.
Ukraina ka kërkuar garanci konkrete sigurie nga mbështetësit e saj perëndimorë, përfshirë trupat në terren, si pjesë e çdo marrëveshjeje paqeje për t’i dhënë fund luftës më shumë se trevjeçare të presidentit rus Vladimir Putin.
Kjo u dakordësua gjatë një takimi midis Trump, Presidentit ukrainas Volodymyr Zelenskyy dhe udhëheqësve të lartë evropianë muajin e kaluar.
Ata që u takuan me Trump në Uashington pritet të mblidhen në Paris të enjten me ftesë të Presidentit të Francës, Emmanuel Macron, për të vazhduar diskutimet e nivelit të lartë, thanë për FT tre diplomatë.
Në takim pritet të marrë pjesë kancelari gjerman Friedrich Merz, kryeministri i Mbretërisë së Bashkuar Sir Keir Starmer, sekretari i përgjithshëm i NATO-s Mark Rutte dhe von der Leyen. Pallati Elize nuk pranoi të komentojë.
Von der Leyen vlerësoi angazhimin e Trump për të marrë pjesë në përpjekjet për paqe.
“Putini nuk ka ndryshuar, ai është një grabitqar. Trump dëshiron paqe dhe Putini nuk po ulet në tryezën e negociatave… Ai ka një përvojë negative me Putinin, gjithnjë e më shumë Putini nuk bën atë që thotë”, shtoi më tej.
