Protesta e opozitës para Parlamentit, Policia: Ja zonat ku do bllokohet qarkullimi nesër

Nga ora 08:00 e mëngjesit ditën e Enjte do të ketë bllokim të përkohshëm të qarkullimit të automjeteve në bulevardin Zhan D’Ark dhe rrugën “Xhorxh Bush”.

Kështu bën me dije Policia e Shtetit. Kjo masë, pasi në orën 10:00 do të zhvillohet protesta e opozitës para Parlamentit.

Blutë u bëjnë thirrje edhe këmbësorëve që të përdorin rrugë alternative.

Njoftimi i plotë:

Policia e Shtetit bën me dije se, ka marrë masa organizative dhe operacionale për garantimin e rendit publik dhe sigurisë gjatë zhvillimit të një tubimi që do të zhvillohet ditën e nesërme, përpara Parlamentit, në orën 10:00.

Në zbatim të planit të masave, në orën 08:00 e në vijim, do të ketë bllokim të përkohshëm të qarkullimit të mjeteve në bulevardin Zhan D’Ark dhe rrugën “Xhorxh Bush”. Drejtuesit e automjeteve, ato të transportit publik, si dhe këmbësorët gjithashtu, të shmangin këto rrugë dhe të përdorin rrugë alternative.

Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime dhe i bën thirrje organizatorëve, drejtuesve, pjesëmarrësve në tubime, dhe perfaqësuesve të subjekteve politike, të ushtrojnë të drejtën e tyre në përputhje me Kushtetutën dhe legjislacionin në fuqi. Policia e Shtetit ka të gjitha kapacitetet për të garantuar të drejtën e tubimit, sipas përcaktimeve ligjore dhe përsërit thirrjen për të respektuar ligjin dhe për t’u distancuar nga çdo akt dhune, pasi nuk do të tolerohen sjellje apo veprime që cenojnë rendin dhe sigurinë publike.