Një goditje për Temu dhe Shein: Franca propozon një “tarifë trajtimi” për çdo pako

Franca ka propozuar vendosjen e një “tarife trajtimi” për çdo pako të vogël që hyn në Evropë nga viti 2026, me qëllim financimin e kontrolleve, të cilat do të duhet të intensifikohen për shkak të “përmbytjes” së artikujve me vlerë të ulët, kryesisht nga Kina, përmes platformave të tilla si Shein dhe Temu. Ministrja e Burimeve Publike Amelie de Montchalin tha se qëllimi është “që importuesit, platformat dhe jo konsumatorët, të paguajnë një shumë të vogël kontraktuale për pakot”. Kjo “tarifë trajtimi” është e ndryshme nga detyrimet doganore të cilat zbatohen sipas vlerës së mallrave të importuara.

Ministrja foli për “disa euro” për pako ose “disa centë” për artikull, gjatë vizitës së saj sot në aeroportin Roissy-Charles-de-Gaulle, pika kryesore e hyrjes së ngarkesave ajrore në Francë

Njoftimi i Montchalin vjen në një kohë kur ka frikë se për shkak të tarifave që Presidenti i SHBA-së Donald Trump dëshiron të vendosë për pakot e vogla nga Kina, platformat do të drejtohen drejt tregut evropian. Michel-Edouard Leclerc, kryetari i komitetit të strategjisë së qendrave me shumicë E.Leclerc, madje parashikoi se do të kishte një “pushtim” të produkteve të tilla.

“Në pritje të reformës së Unionit Doganor në vitin 2028, Franca do të mbrojë vendosjen e shpejtë, në nivel evropian, të një mekanizmi tarife trajtimi për çdo pako të vogël që hyn në Evropë. “Paratë e mbledhura do të përdoren për të financuar inspektimet”, tha zyra e ministrit për AFP-në.

“Nuk mund të veprojmë vetëm, sepse nëse veprojmë, fluksi i pakove do të shkojë në një vend tjetër”, komentoi Ministri i Ekonomisë Eric Lobar , duke zbuluar se “Holanda është shumë e interesuar” për këtë çështje dhe duke shprehur shpresën “se një grup vendesh që mund ta zbatojnë këtë masë do të formohet sa më shpejt të jetë e mundur”.

Tarifa do të vendoset nga viti 2026 deri në vitin 2028, kohë në të cilën Bashkimi Evropian mund të heqë përjashtimin nga taksat doganore për pakot me vlerë më pak se 150 euro me origjinë nga vendet e treta.

Franca do të shtojë kontrollet mbi pakot që përmbajnë kozmetikë ose ilaçe , potencialisht të rrezikshme për shëndetin, si dhe për të përcaktuar nëse produktet e importuara përmbushin rregullat e sigurisë. Gjithashtu do të shqyrtojë vlerën e pakove, në mënyrë që ato të mos përjashtohen nga detyrimet doganore, tha Montchalin.

Emrat e produkteve të tërhequra për shkak se nuk përputhen me rregulloret evropiane do të bëhen publike në faqet e rrjeteve sociale, tha Véronique Louvazy, Ministre e Ndërmarrjeve të Vogla dhe të Mesme, e cila shoqëroi Montchalin në vizitën e saj në aeroport