Nis faza e dytë e regjistrimeve në Universitetin e Tiranës për vitin akademik 2025–2026, do të zgjasë për 48 orë
Kjo e dielë shënoi nisjen e fazës së dytë të regjistrimeve të fituesve në degët e studimit në Universitetin e Tiranës, për vitin akademik 2025-2026.
Edhe kjo fazë sipas rregullores do të zgjasë për 48 orë.
Kandidatët fitues duhet të paraqiten pranë sekretarive mësimore të fakulteteve përkatëse me dokumentacionin e nevojshëm për të përfunduar procesin e regjistrimit.
Universiteti i Tiranës, sqaron se “pas çdo raundi zhvendoset vija e kuqe në listë dhe mund të përfshihen fitues të rinj, të cilët regjistrohen vetëm në fazën pasardhëse”.
Raundi i parë i regjistrimeve zhvillohet nga data 29 gusht deri më 11 shtator 2025, i ndarë në 7 faza 48-orëshe: Faza I ishte më 29–30 gusht; Faza II është nga 31 gushti – 1 shtator; Faza III: 2–3 shtator; Faza IV: 4–5 shtator; Faza V: 6–7 shtator; Faza VI: 8–9 shtator dhe Faza VII: 10–11 shtator.
Pas përfundimit të fazave të përcaktuara, do të ketë edhe një periudhë çregjistrimi për ata që dëshirojnë të ndryshojnë degën dhe të rikthehen në garë për raundin e dytë.
Universiteti i Tiranës, si më i madhi në vend, ofron 164 programe studimi.
Të dhënat e Rrjetit Akademik Shqiptar tregojnë se degët e preferuara për këtë vit janë Teknologjia dhe Inxhineria, ndjekur më pas nga mjekësia.
Mbi 20.000 maturantë aplikuan për studime në universitetet publike dhe private në të gjithë vendin, sipas të dhënave zyrtare, që tregojnë një rritje në krahasim me vitin e kaluar.
