Mourinho: Me Barçën, humbja më e mirë e karrierës

Jose Mourinho i rikthehet viteve të suksesshme te Interi. Trajneri portugez është intervistuar nga BBC si pjesë e një dokumentari me titull, “Si të fitosh Champions League”.

“Të luash me 10 lojtarë në Barcelonë bëhet epike. Ju duhen heronj. Duhet të merrni më të mirën nga të gjithë. Mendoj se isha i shkëlqyer në mënyrën se si organizova ekipin. Ne u mbrojtëm me të gjitha forcat: me zemër, me shpirt. Kjo është humbja më e mirë në karrierën time. Ne dhamë gjithçka. Humbëm 1-0. Por arritëm në finale”.

Më pas, trajneri aktual i Fenerbahçes ka folur edhe për lamtumirën e rrufeshme pas finales së Madridit: “Ika, shkova në autobus për t’i thënë lamtumirë dhe as që ia shtrëngova dorën askujt”, tha Mourinho.

“Doja të arratisesha. Mendoj se nëse do të kisha hipur në autobus, po të kthehesha me ta në Milano, nëse do të kisha hyrë në një San Siro të plotë, nëse do të kisha parë Duomon plot me njerëz, mendoj se nuk do të kisha shkuar te Real Madrid, emocioni do të më kishte penguar. Por doja të shkoja. Ishte momenti i duhur. Më duhej të arratisesha”.