Lajmi i fundit nga tuneli i Murrizit

Puna në Tunelin e Murrizit, pjesë e Rrugës së Arbrit, është në fazën finale, duke përfshirë betonimin e 400 metrave të fundit. Ekipet po punojnë pa ndalesë, edhe pse gjeologjia e vështirë dhe burimet e shumta ujore kanë ndikuar në ritmin e punimeve.

Për momentin, puna po vijon në të dyja drejtimet, dhe qëllimi është që tuneli të hapet për qarkullimin e automjeteve deri në fund të vitit. Ky është një nga projektet më të rëndësishëm të Rrugës së Arbrit dhe përfundimi i tij do të jetë një hap i madh për infrastrukturën e zonës.

Zëvendëskryeministrja dhe Ministër i Infrastrukturës dhe Energjisë, Belinda Balluku, së bashku me Drejtorin e Autoritetit Rrugor Shqiptar, Gentian Gjyli, dhe përfaqësues të firmës që po realizon punimet, vizituan kantierin për të parë nga afër ecurinë e punimeve. Ata morën informacion mbi progresin prej 87% dhe u njohën me sfidat që janë përballuar në lidhje me gjeologjinë e kompleksuar të zonës.

Tuneli i Murrizit është një projekt ambicioz që përfshin gjithashtu 11 tunele lidhëse që lidhin tunelin kryesor me atë të emergjencës. Balluku theksoi se ky projekt është shumë i rëndësishëm, pasi do të shkurtojë ndjeshëm distancën mes qarkut të Dibrës dhe kryeqytetit dhe do të stimulojë zhvillimin ekonomik të zonës. Sipas saj, rritja e numrit të njësive akomoduese dhe vizitorëve në këtë zonë është një dëshmi e këtij zhvillimi.

Balluku shpreson që tuneli të përfundojë brenda vitit 2024. Ajo e vlerëson këtë tunel si një lidhje të rëndësishme për verilindjen e Shqipërisë dhe për Maqedoninë e Veriut, duke theksuar se është një nga rrugët më të rëndësishme që lidh kryeqytetin me zonat veriore të vendit. Tuneli ka një gjatësi prej 3.78 kilometrash dhe përbëhet nga dy tuba: një për trafikun dhe një tjetër për emergjencat.

Per me shume shiko videon