Kush ka luajtur me kombëtaren ka një vend në Shqipëri–Itali: FSHF fton ish-kuqezinjtë në debutim
Euro 2024 po afron dhe përgatitjet tashmë kanë arritur te detajet. Shqipëria bëhet gati tani për prezantimin e dytë historik në finalet e një kompeticioni europian, ndaj dhe FSHF kërkon ta kthejë në një festë të vërtetë. Kështu, Federata Shqiptare e Futbollit ka ndërmarrë një iniciativë shumë të veçantë për ndeshjen e parë të Kombëtares shqiptare në Kampionatin Europian “Gjermani 2024”.
Departamenti i Komunikimit në FSHF bën me dije se në stadiumin e Dortmundit, aty ku edhe do të luhet takimi i parë i kuqezinjve ndaj Italisë janë rezervuar vende për të gjithë ish-futbollistët e ekipit kombëtar që kanë luajtur qoftë edhe një minutë të vetme me fanellën shqiptare.
Të gjitha kostot e udhëtimit, qëndrimit dhe biletat e ndeshjes do të mbulohen nga FSHF. Institucioni që drejton futbollin në vend dëshiron që të vlerësojë në këtë mënyrë të gjithë ata futbollistë dhe emra të mëdhenj të futbollit shqiptar, të cilët kanë përfaqësuar dhe kanë dhënë gjithçka për fanellën e Kombit në të kaluarën.
Lexo më tej: Merret vendimi nga UEFA, në Europian me 26 lojtarë: Sylvinho me dhimbje koke, Daku ëndërron Gjermaninë
Shqipëria do të luajë ndeshjen e parë ndaj Italisë në Kampionatin Europian “Gjermani 2024” më 15 qershor në ora 21:00 dhe mes mijëra tifozëve shqptarë, do të jenë të pranishëm edhe shumë emra të mëdhenj të futbollit shqiptar dhe që kanë lënë gjurmë me ekipin kombëtar.
🤩 Çdo futbollist, i cili ka veshur qoftë edhe një minutë fanellën e Kombëtares 🔴⚫, do të jetë i pranishëm në ndeshjen Itali-Shqipëri!
👏 Ashtu sikurse në Euro 2016, FSHF nuk i ka harruar as në këtë Europian ata që kanë kontribuuar me fanellën e 🇦🇱 ndër vite.#Euro2024 pic.twitter.com/2XlGPAK2Yj
— FSHF (@FSHForg) May 10, 2024
