Autoritetet hungareze kanë sekuestruar afro 20 milionë dollarë në para të gatshme, disa prej të cilave ishin groposur në pyje ose fshehur në ndërtesa fermash dhe magazina, në kuadër të një hetimi për korrupsion dhe ryshfet ndaj Miklos Sesztak, ministër në qeverinë e ish-liderit të djathtë Viktor Orban.
Kryeministri Peter Magyar e largoi nacionalistin Orban nga pushteti pas 16 vitesh, në zgjedhjet e prillit, duke premtuar përmirësimin e marrëdhënieve me Bashkimin Evropian, të cilat ishin dëmtuar nga konfliktet e vazhdueshme gjatë qeverisjes së Orbanit, si dhe nisjen e një fushate të gjerë kundër korrupsionit dhe akuzave për përvetësim fondesh.
Dy ish-ministra të qeverisë së Orbanit dhe ish-guvernatori i Bankës Qëndrore, Gyorgy Matolcsy, ndodhen në arrest në kuadër të hetimeve të veçanta për korrupsion. Ata i kanë mohuar akuzat.
Autoritetet kanë ndaluar gjithashtu vëllain e Orbanit në një çështje që lidhet me trafikimin e personave, të cilën ish-lideri e kishte cilësuar si një akt hakmarrjeje politike.
Fushata kundër korrupsionit është pjesë e operacionit që kryeministri i qendrës së djathtë, Magyar, e ka pagëzuar me emrin “Operacioni Purgatori”. Ky operacion konsiderohet “shumë i rëndësishëm” nga 70% e të anketuarve në një sondazh të realizuar nga instituti Median, rezultatet e të cilit u publikuan këtë javë në faqen e lajmeve HVG.
“Gjatë kontrolleve, hetuesit zbuluan shuma të mëdha parash të groposura në pyje, të fshehura në ndërtesa fermash, magazina dhe një pronë banimi, si dhe të depozituara në një kasafortë me vlerë të lartë, në një vend të izoluar”, deklaroi të premten në mbrëmje Zyra Kombëtare për Rikuperimin dhe Mbrojtjen e Pasurive.
Paratë e sekuestruara përfshijnë 5.07 miliardë forinta (15.33 milionë dollarë), 2.66 milionë euro (2.93 milionë dollarë) dhe 1.26 milionë dollarë. Sipas ministrit të Financave, Andras Karman, 12 punonjësve të Thesarit të Shtetit iu deshën tetë orë për të numëruar të gjithë shumën, duke përdorur pesë makina për numërimin e kartëmonedhave.
Sesztak, i cili shërbeu si ministër i Zhvillimit në qeverinë e Orbanit nga viti 2014 deri në vitin 2018, ka mohuar çdo shkelje të ligjit. Avokati i tij, Gabor Papp, nuk iu përgjigj një kërkese për koment të dërguar me email lidhur me deklaratën e zyrës së rikuperimit të pasurive.
Magyar deklaroi se paratë e sekuestruara shënojnë fundin e asaj që ai e përshkroi si një sistem “mafieje”, të drejtuar nga partia e djathtë Fidesz e Orbanit dhe aleatët e saj kristiandemokratë gjatë 16 viteve të qeverisjes së tij.
Politologu Gabor Torok u shpreh se pamjet e sasive të mëdha të parave të sekuestruara ishin aq tronditëse, saqë mund të shënonin fundin politik të Fidesz-it. Sipas një sondazhi të institutit Median, mbështetja publike për partinë ishte përgjysmuar, duke zbritur në vetëm 16% të votuesve deri në muajin nëntor, krahasuar me nivelet që kishte përpara zgjedhjeve.
starnews.al
