Bisedimet në zhvillim e sipër për transferimin sensacional të Messit larg Inter Miamit
Futbollisti i njohur Lionel Messi mund të ndryshojë sërish skuadër, pasi sipas raporteve të fundit janë rihapur bisedimet për një transferim të mundshëm nga Inter Miami, ku aktualisht luan.
Pas dy sezoneve te PSG në periudhën 2021–2023, ku shënoi 32 gola në 75 ndeshje dhe fitoi dy tituj të Ligue 1, Messi u transferua në Major League Soccer te Inter Miami. Që nga ajo kohë, 37-vjeçari ka realizuar 49 gola në 59 ndeshje për klubin amerikan.
Kontrata e Messit me Inter Miami përfundon në fund të vitit 2025, duke lënë të hapur të ardhmen e tij për pas kësaj date.
Sipas raportimeve, Fondi i Investimeve Publike i Arabisë Saudite (PIF) ka rifilluar kontaktet me Messin, duke tentuar ta bindë atë të transferohet në Superligën e Arabisë Saudite.
Arabia Saudite konsiderohej një destinacion potencial i Messit kur u largua nga PSG në 2023, por atëherë ai zgjodhi MLS.
Tani, Fondi Saudit synon që Messi të bashkohet me kampionatin dhe të jetë një prej fytyrave kryesore së bashku me rivalin e tij Cristiano Ronaldo.
Aktualisht, Messi është i përqendruar te detyrat me Inter Miami dhe në Kupën e Botës për Klube, por PIF shpreson që bisedimet të përfundojnë me sukses dhe mund të ketë zhvillime të reja në ditët në vijim.
Ende nuk dihet se cili klub nga Arabia Saudite mund të jetë destinacioni i yllit argjentinas, pasi Fondi dëshiron të kuptojë mirë planet dhe qëllimet e Messit para se të bëjë oferta konkrete.
