Akuzohet se kërkoi ryshfet për një tendë pa leje/ GJKKO cakton arrest me burg për inspektorin e IMT Tiranë, Gerald Fuçia: Nuk kam lidhje me ngjarjen
Gjykata e Posaçme ka caktuar masën e sigurisë “arrest me burg” për inspektorin e IMT-së së Tiranës, Gerald Fuçia. Ai u vu në pranga me urdhër të Prokurorisë së Posaçme, pas një denoncimi nga një pronar lokali se bashkë me disa të tjerë, Fuçia kishte kërkuar 1000 euro ryshfet për disa tenda që ishin pa leje.
Në seancën me dyer të mbyllura, Fuçia ka mohuar çdo akuzë ndaj dhe çdo përfshirje në ngjarje, duke u shprehur se as nuk e njeh qytetarin që ka bërë denoncimin.
Nuk e njoh fare qytetarin, as e kam kontaktuar, as takuar, as nuk di gjë për ryshfetin. Deklaroj me përgjegjësi morale dhe ligjore se nuk kam lidhje me këtë histori. E ushtroj detyrën me seriozitet dhe profesionalizëm, si në dhjetëra raste të tjera të aksionit për lirimin e hapësirave publike.”, është shprehur Fuçia.
Avokatja e këtij të fundit është shprehur se Klajdi Zhilla, një tjetër i akuzuar për ryshfet ishte ai që merrte paratë nga biznesi.
“Klajdi Zhilla është personi që ka mbajtur kontakt me personin e dëmtuar dhe ka shkuar edhe ka tërhequr shumën monetare. Kjo shumë i është dhënë kamarierit të lokalit Cormeun për ta mbajtur aty nga vetë Klajdi Zhilla dhe policia ka sekuestruar këtë shumë që Klajdi Zhilla kishte marrë tek qytetari. është Klajdi Zhilla që ka patur kontaktet me qytetarin dhe është ai që ka tërhequr shumën tek banaku i lokalit që kapi Policia. Dhe pikërisht kjo shumë ka dalë nga buxheti i shtetit për efekt të këtij operacioni”, raportohet se ka thënë avokatja.
Ndërkohë Klajdi Zhilla ishte shpallur në kërkim me urdhër të SPAK, por u vetëdorëzua paraditen e sotme në polici. Zhilla është shprehur se është vënë në dijeni nga media se ishte në kërkim dhe është vetëdorëzuar për të sqaruar pozicionin e tij. Në kuadër të aksionit të SPAK, në pranga bashkë është vënë dhe një tjetër punonjës i IMT Tiranë, Edmond Çela.
Në kërkim është vënë edhe një person tjetër. Arrestimi i Fuçias dhe Çelës ka ndodhur në lokalin e ish-deputetit, Mark Frroku në Kombinat. Policia më 27 gusht gjithashtu ka vënë në pranga ish-kryeinspektorin e Inspektoratit të Mbrojtjes së Territorit (IMT) në Bashkinë Durrës, Ardian Halili. Ai akuzohet për ndërtim të paligjshëm në një zonë bregdetare në fshatin Shetaj të Ishmit. Ditën e djeshme është kryer edhe shembja e resortit pa leje.
