Ushtria izraelite do të dërgojë “valë” formularësh rekrutimi për 54,000 hebrenj ultra-ortodoksë
Ushtria izraelite ka njoftuar se do të dërgojë 54,000 formularë rekrutimi për hebrenjtë ultra-ortodoksë, të cilët për dekada të tëra janë përjashtuar nga shërbimi ushtarak.
“Ushtria do të fillojë këtë javë të dërgojë karta rekrutimi si pjesë e procedurave të rekrutimit për anëtarët e komunitetit ultra-ortodoks për të cilët statusi i studentit të yeshiva (shkollës talmudike) nuk është më i vlefshëm pas skadimit të ligjit (përkatës)”, tha ushtria izraelite në një deklaratë.
Rekrutimi i hebrenjve ultra-ortodoksë është një problem për qeverinë e Benjamin Netanyahu, e cila u formua në dhjetor 2022 dhe mbetet e tillë falë aleancës së partisë Likud të kryeministrit me partitë fetare të ekstremit të djathtë dhe ultra-ortodokse izraelite që këmbëngulin në ruajtjen e përjashtimit, gjë që po krijon shqetësime në rritje në pjesën tjetër të shoqërisë izraelite pas 21 muajsh lufte në Gaza dhe konflikteve në Liban, Siri dhe Iran.
Bazuar në një marrëveshje që daton që nga themelimi i shtetit të Izraelit në vitin 1948, burrat haredim kanë përfituar për dekada nga një përjashtim de facto nga shërbimi ushtarak me kusht që e gjithë koha e tyre t’i kushtohet studimit të teksteve të shenjta të judaizmit në shkollat talmudike.
Ky përjashtim u kundërshtua nga Gjykata e Lartë në vitet 2000, gjë që i detyroi qeveritë e njëpasnjëshme të hartonin marrëveshje të përkohshme ligjore për të mbajtur të kënaqur ultra-ortodoksët, të cilët krijojnë dhe shkatërrojnë qeveritë. Që nga qershori i vitit 2024, qeveria ka qenë nën presion nga gjyqësori për të vazhduar me rekrutimin e ultra-ortodoksëve në mungesë të një ligji që garanton përjashtimin e tyre.
Komuniteti ultra-ortodoks përbën 14 përqind të popullsisë hebraike të Izraelit, që numëron rreth 1.3 milion njerëz, dhe 66,000 janë në moshë ushtarake dhe deri më tani janë përjashtuar. Disa rabinë argumentojnë se studimi i Torës e mbron vendin po aq sa edhe ushtria. Të tjerë kanë frikë se përfshirja e hebrenjve të rinj ultra-ortodoksë në një korpus burrash jofetarë, në të cilin shërbejnë edhe gratë, do të ndryshojë identitetin e tyre fetar.
